About Pond Inlet

ᒥᑦᑎᒪᑕᓕᒃ ᕿᑭᖅᑖᓘᑉ ᓯᒡᔭᖓᑦᑕ ᐅᐊᖕᓇᖓᓃᑉᐳᖅ ᑲᓇᖕᓇᖅᐸᓯᖓᓂᑦ, ᐊᑭᐊᑕ ᐊᑭᑦᑎᐊᖓᓂᑦ. ᐃᓄᖕᓄᑦ ᖃᐅᔨᒪᔭᐅᔪᖅ ᐃᒪᓐᓇ ᒥᑦᑎᒪᑕᓕᒃ, “ᒥᑦᑎᒪᐅ ᐃᓗᕕᖃᕐᕕᖓᑦ”. ᐊᑎᖓᑦ ᐊᑐᐃᓐᓇᕋᓗᐊᖅᑎᓪᓗᓂᑦ, ᒥᑦᑎᒪᐅ ᑕᐅᑦᑐᖓ ᓇᓗᓇᖅᑑᕗᖅ ᓱᓕ ᐅᓪᓗᒥᐅᔪᖅ ᒥᑦᑎᒪᑕᓕᐅ ᐃᓄᖁᑎᖏᓐᓄᑦ. ᒥᑦᑎᒪᑕᓕᒃ ᓄᓇᕗᒻᒥ ᐱᐅᒋᔭᐅᓂᖅᐹᖑᖃᑕᐅᕗᖅ. ᖃᔾᔮᕐᓇᕐᓂᐊᓗᖓᑦ ᖃᓄᑐᐃᓐᓇᖅ ᖃᖅᑲᐅᕗᑦ, ᓯᕐᒥᐊᓘᕗᑦ, ᐊᒻᒪ ᐱᖃᓗᔭᑦ ᖃᐃᑎᑦᓯᕙᒃᑐᑦ ᐊᒥᓱᓂᒃ ᐳᓚᕋᖅᑎᓂᒃ ᓇᑭᑐᐃᓐᓇᖅ ᓄᓇᕐᔪᐊᒥᙶᖅᑐᓂᒃ. ᐊᒥᓱᓂᒃ ᐊᐅᓪᓛᖅᑎᑦᓯᔨᑕᖃᖅᐳᖅ ᐳᓚᕋᖅᑎᓂᒃ ᕿᒧᒃᓯᒃᑰᖅᑎᑦᓯᔪᓐᓇᖅᑐᑦ ᐅᕝᕙᓘᓐᓃ ᖃᒧᑕᐅᔭᒃᑯᑦ ᑕᑯᔪᒪᓪᓗᑎᒃ ᐊᒥᒐᖏᑦᑐᓂᒃ ᓂᕐᔪᑎᓂᒃ ᐊᒻᒪ ᑲᔾᔭᐅᓴᒍᒪᓪᓗᑎᒃ ᒥᑦᑎᒪᑕᓕᐅ ᐱᕕᖃᖅᑎᑕᖓᓂᑦ. ᓄᓇᕗᑦ ᒐᕙᒪᐅ ᐃᓚᖓᑦ ᓄᒃᑎᖅᑎᕆᓂᕐᒧᑦ ᐸᕐᓇᐅᑎᖓᑦ ᓴᖅᑮᓂᕐᒧᑦ ᐃᖅᑲᓇᐃᔮᓂᒃ ᓄᓇᕗᓕᒫᒥᒃ, ᒥᑦᑎᒪᑕᓕᒃ ᕿᑭᖅᑖᓗᖕᒥᑦ ᑐᑦᑕᕐᕕᐅᓕᖅᐳᖅ ᐱᕙᓪᓕᐊᔪᓕᕆᔨᒃᑯᓐᓄᑦ ᐃᖏᕐᕋᔪᓕᕆᔨᒃᑯᓐᓄᓗ. ᓄᓇᓕᖓᑦ ᑕᑯᕗᖅ ᐊᖏᒡᓕᕙᓪᓕᐊᓂᕆᔭᐅᔪᓂᒃ ᒐᕙᒪᐅ, ᐳᓚᕋᖅᑐᓕᕆᓂᐅ ᐊᒻᒪ ᓇᖕᒥᓂᖃᖅᑏᑦ ᐃᓚᐅᔪᓄᑦ ᓴᓇᐅᒐᓕᕆᓂᕐᒧᑦ ᐊᒻᒪ ᐊᖑᓇᓱᒃᑐᓕᕆᓂᕐᒧᑦ ᓯᕗᓂᐊᓄᑦ ᐱᕙᓪᓕᐊᔪᓕᕆᓂᕐᒧᑦ.

ᓄᓇᓕᐅᑉ ᐃᓄᖏᑦ: 1,668